«Hakimlərin yol verdiyi qanun pozuntuları Məhkəmə Hüquq Şurasında müzakirə olunur və onlar haqda tədbir görülür». Bunu jurnalistlərə açıqlamasında Ali Məhkəmənin sədri Ramiz Rzayev deyib:

«2005-ci ildən bu vaxta kimi hakimlər haqda mindən çox intizam icraatı başlanılıb. 75 hakim intizam məsuliyyətinə cəlb edilib».

Ramiz Rzayev deyir ki, hakim işə baxdığı zaman yanlışlığa, qanun pozuntusuna yol verirsə, ədalətsizlik edirsə bu yolverilməzdir. Biz belə hakimlərə qarşı çox tələbkarıq:

«Mən demirəm ki, bizim qəbul etdiyimiz bütün qərarlar mütləqdir. Ancaq bu həqiqət də var ki, hakimlər haqqında müsbət rəyin yaranmamasında jurnalistlər də kömək edir. Şikayətçi necə deyir elə də yazırlar. Bu da ictimai rəyə təsir göstərir».

Barak Obama prezident seçilməmişdən əvvəl Amerikanın Kubadakı hərbi bazasındakı Quantanamo həbsxanasını bağlayacağını vəd etmişdi.

Prezident Obama bu gün həmin vədini Avropa Birliyi ölkələrinin dəstəyi hesabına həll etməyə çalışır. Artıq Brüsseldən Obamanın istəyinə müsbət cavab gəlib.

“Media forum” saytı xəbər verir ki, Avropa Birliyi ölkələrinin xarici işlər nazirləri fevralın 26-da Brüsseldə toplanaraq Quantanamo həbsxanasındakı məhbusları öz ölkələrində yerləşdirməyə hazır olduqlarını bildiriblər.

Nazirlərin çıxardığı qərara görə, Avropa Birliyinə üzv olan hər bir ölkə istədiyi qədər məhbusu qəbul edə bilər. Söhbət o məhbuslardan gedir ki, onların təqsiri sübuta yetirilməyib. Belələri ailələriylə birgə 60 nəfərdir.

Avropa Birliyinin bu qərarı humanizm prinsipləriylə əsaslandırılır. Çünki məhbusların öz ölkələrinə qayıtması təhlükəlidir.

Bu gün 18:15-də İctimai Televiziyada referendumla bağlı ikinci debat keçiriləcək.

“Media forum” saytı xəbər verir ki, “Zəka” təşviqat qrupunu debatda hüquq elmləri doktoru Mirağa Cəfərquliyev təmsil edəcək.

“Hüquq və Demokratiya” təşviqat qrupu adından deputat Qüdrət Həsənquliyev, yaxud deputat Zahid Oruc danışacaq.

“Respublikaçılar” təşviqat qrupunu Müsavat Partiyası Mərkəzi İcra Aparatının rəhbəri Arif Hacılı təmsil edəcək.

“Qarabağ və Respublika Uğrunda Vətəndaş Hərəkatı” təşviqat qrupu adından debata Vətəndaş və İnfişaf Partiyasının sədri Əli Əliyev qatılacaq.