Azərbaycan Respublikası Ali Məhkəməsinin sədri Ramiz Rzayevin başçılıq etdiyi nümayəndə heyəti yanvarın 30-da Avropa İnsan Hüquqları Məhkəməsinin Strasburqda keçirilən 50 illik yubiley mərasiminə həsr olunmuş seminarda iştirak etmişdir.
Seminarda Avropa İnsan Hüquqları Məhkəməsinin keçdiyi 50 illik yola nəzər salınmışdır. Avropa İnsan Hüquqları Məhkəməsinin insan hüquqlarının müdafiəsi sahəsində gördüyü işlərlə bağlı geniş diskussiyalar və müzakirələr aparılmışdır.
Seminarda beynəlxalq hüququn müxtəlif aspektləri barədə məruzələr dinlənilmişdir. Qeyd olunmuşdur ki, 1959-cu il yanvarın 21-də Avropa Şurasının Məşvərətverici Assambleyasının keçirdiyi iclasda ilk dəfə insan hüquqlarının müdafiəsi üçün yaradılan məhkəməyə müstəqil şəkildə hakimlərin seçkisi aparılmışdır.
Seminarda Avropa İnsan Hüquqları Məhkəməsinin sədri Jan-Pol Kostanın məruzəsi maraqla qarşılanmışdır. Sədr məruzəsində 50 il ərzində beynəlxalq hüququn inkişafı, beynəlxalq məhkəmələrin rolunun və nüfuzunun artması, beynəlxalq hüququn fəaliyyətinin səmərəli nəticələrindən danışmışdır.

Ombudsman Aparatından bildirmişlər ki, Azərbaycan Respublikasının insan hüquqları üzrə müvəkkili Elmira Süleymanova Berlində Almaniya Federativ Respublikasının Federal Xarici İdarəsi tərəfindən təşkil olunmuş “Cənubi Qafqazda stabilləşmə prosesləri” mövzusunda tədbirlərdə iştirak etmişdir.
Tədbirin ilk günü Federal Xarici İdarə nümayəndələri ilə görüşdə E.Süleymanova Ermənistan-Azərbaycan, Dağlıq Qarabağ münaqişəsinin adi bir konflikt deyil, Ermənistanın ölkəmizə qarşı davamlı və uzunmüddətli təcavüzü olduğunu diqqətə çatdırmışdır.
Daha sonra Almaniya Kanslerinin ofisində keçirilən görüşdə E.Süleymanova Dağlıq Qarabağ münaqişəsinin həllində Almaniya Kansleri A.Merkelin dəstəyinin önəmli olduğunu qeyd etmişdir.
ATƏT və Avropa Şurası parlament assambleyalarında Almaniya nümayəndə heyətlərinin üzvləri ilə görüş zamanı ombudsman Ermənistanın Azərbaycana təcavüzünün bütövlükdə Cənubi Qafqazda sülh, sabitlik və inkişaf proseslərinə mənfi təsir göstərdiyini vurğulamışdır.
Səfər çərçivəsində keçirilən digər görüşlərdə də Cənubi Qafqazda sülh və sabitlik problemi əsas müzakirə mövzusu olmuşdur. (AzərTAc)