Hamımıza məlum olduğu kimi, dünya tarixində analoqu çox az olan hadisələrdən biri Qarabağın ən qədim insan məskənlərindən olan Xocalıda baş vermiş soyqırım olmuşdur. Azərbaycanın müasir tarixində qara səhifələrdən biri olan bu faciə bütün insanlıq əleyhinə törədilmiş bir cinayətdir. Əfsuslar olsun ki, Xocalı faciəsinin insanlıq əleyhinə ən vəhşi şəkildə törədilmiş bir soyqırım olması ortadaykən, dünya ictimaiyyəti bu faciədən və onun miqyasından tam anlamda məlumatlı deyil.

Azərbaycan Respublikası Prezidenti İlham Əliyev cənablarının 17 yanvar 2012-ci il tarixində imzaladığı sərəncamda deyilir: “Azərbaycanlılara qarşı erməni şovinist dairələrinin XIX-XX əsrlərdə mərhələ-mərhələ həyata keçirdiyi etnik təmizləmə siyasətinin tərkib hissəsi olan Xocalı soyqırımı haqqında həqiqətlər dünya ictimaiyyətinə, xarici ölkələrin parlamentlərinə çatdırılmalı, Azərbaycan xalqının və ümumən insanlığın əleyhinə yönəldilmiş bu son dərəcə ağır hərbi cinayət beynəlxalq miqyasda öz hüquqi-siyasi qiymətini almalıdır”.

Hesab edirik ki, qatı düşmənlərimiz olan mənfur ermənilərin xalqımıza qarşı törətdiyi bu əməli dünya ictimaiyyətinə tanıtmaq yalnız dövlətin deyil, ölkədə fəaliyyət göstərən bütün sektorların məsuliyyəti, hər birimizin vətəndaşlıq borcudur.

“Azərbaycanda İnsan Hüquqlarına Dair Beynəlxalq Standartların Təsbiti üzrə Birgə İşçi Qrupu” (BIQ) və “Azərbaycanda Vətəndaş Cəmiyyətinin İnkişafına Yardım Assosiasiyası” (AVCIYA) bu məqsədlə birgə Beynəlxalq Konfrans keçirəcəkdir. Konfrans 24 fevral 2012-ci il tarixində Hilton Otelində baş tutacaqdır. Konfransda ölkəmizdəki diplomatik korpus, dövlət qurumları təmsilçiləri, tanınmış ictimai xadimlər və beynəlxalq ekspertlər (Hüquqşünaslar, deputatlar, ictimai xadimlər, jurnalistlər) iştirak edəcəklər. 1 iş günü ərzində davam edəcək Beynəlxalq Konfransda “Ermənistanın etnik təmizləmə və soyqırım cinayətlərinin ən qanlı səhifəsi – Xocalı faciəsi”, “Xocalı Soyqırımı – insanlıq əleyhinə cinayət”, “Xocalı faciəsinin tarixi kökləri”, “Xocalı Soyqırımı – həqiqətlə üzləşmək vaxtıdır!”, “Ermənistanın işğal etdiyi ərazilərdə törətdiyi cinayətlərinin dünyaya tanıtdırılmasının zərurəti və mexanizmləri” və sair mövzularda yerli və xarici ölkə nümayəndələrinin çıxışları dinlənəcək, müzakirələr aparılacaqdır.