İclasda “Amnesty İnternational” təşkilatının “Heç vaxt çiçəklənməyən bahar: Azərbaycanda azadlıqlar tapdanır”(2011) adlı hesabatı ilə bağlı fikirlər səsləndirilib, o cümlədən qurumun rəyi açıqlanıb.

Tədbirdə çıxış edən işçi qrupun həmsədri Şahin Camalov deyib ki, “Amnesty İnternational” hesabatı əsassız iddialara və qərəzə söykənib: “Bəxtiyar Hacıyev hərbi xidmətdən yayınıb və məhkəmə onun haqqında həbs qərarı verib. Əgər bu qərar verilməsəydi, digərlərinin konstitusion vəzifələrindən yayınmasına səbəb ola bilərdi. Bəxtiyar Hacıyev vicdan məhbusu elan etmək düzgün deyil. Sadəcə özünəməxsus meyarlarla kimisə siyasi və vicdan məhbusu adlandırmaq əsassızdır”.

İşçi qrupun üzvü, Belçika Konstitusiya Məhkəməsinin hakimi Jan-Pol Murman isə bildirib ki, bu günə qədər “Amnesty İnternational” təşkilatının bəyanatları daha çox reallıqdan kənar olub: “Belə hesabatlar demokratik təsisatlara qarşı mənfi fikir formalaşdıra bilər. Bu çox mənfi haldır və regionda demokratiyanın inkişafına mane olur”.

Sloveniya parlamentinin və AŞ PA Monitorinq Komitəsinin üzvü Zmago Jelinchic və Belçika parlamentinin üzvü Alain Destexe hesabatı hazırlayanları qeyri-obyektivlikdə günahlandırıb: “Hesabatda qərəzsiz araşdırma və tədqiqat aparılması prinsip və meyarları pozulub, alternativ informasiya mənbələrindən istifadə edilməyib və o, əvvəlcədən müəyyənləşmiş mövqeyin müdafiəsi məqsədilə hazırlanıb. Təəssüfedici haldır ki, hesabat müəllifləri öz iddialarını sübuta yetirmək üçün eyni və birtərəfli mənbələrə istinad edirlər. Misal üçün, göstərmək lazımdır ki, hesabatın vətəndaş cəmiyyətinə dair bölməsində əksər hallarda təqdim edilən məlumatlar yalnız eyni mənbəyə, konkret olaraq “Azadlıq” radiosunun Bakı Bürosunun və müxalif mövqedən çıxış edən KİV-in informasiyalarına istinad edilərək verilir. Hesabatın digər bölməsində də belə birtərəfli mənbələrə istinad edilir. Bu isə öz növbəsində Amnesty İnternational təşkilatının hesabatının obyektivliyini şübhə altına alır”.

http://az.apa.az/xeber_Insan_Huquqlarina_dair_Beynelxalq__244278.html